မေ(သို့မဟုတ်)နွေ
ဝိသာခါကြယ်ရောင်ထွန်း……….
ထွန်းထိန်လို့ဝေ၊
တိမ်ဘုံဗွေမေဃဝန်မိုးသံကျူး
ထူးထွေမြူးပေ၊
ဖူးရွှေခိုင်မြတ် ပန်းပိတောက်တွေ
စကားဝါပွင့်တွေ၊
တူစုံမောင်မယ် ခူးစို့လေ။
(မြို့မငြိမ်း)
အရင်တုန်းက ညောင်ရေသွန်းပွဲတော်မှာ အထူးစည်ကားလှသည်။ ပတ်ဝန်းကျင်ကျေးရွာများမှ ရှေ့ဝင်းနောက်ဝင်းခင်းကာ ညောင်ရေသွန်းပွဲ ဆင်နွှဲကြပါသည်။
မန္တလေးမှာတော့ မဟာမုနိ၊ ဗောဓိကုန်း၊ ရန်ကင်းတောင်၊ မန္တလေးတောင်တို့၌ စည်ကားသည်။ ဗောဓိညောင်ပင်ခြေတော်ရင်းမှာ ရေအိုးတစ်လုံးပြီးတစ်လုံး ပြိုင်တူလက်ဆုံရင်း ညောင်ရေလောင်းကြတော့….. သူ့ကိုယ့်၊ ကိုယ့်ကိုယ်ရေစိုရွှဲရတော့၏။ သူကလည်း နောက်ဆုတ်ဦးမှာမဟုတ်…။ ကိုယ်ကလည်း ဖိုးကျိုင်းတုတ်။
ရေစက်ရေမှုန်ကြားမှ ခိုးကြည့်ရသော်လည်း သူ့တစ်မျက်နှာက ကိုယ့်မျက်နှာနှင့်တစ်တောင်သာသာအကွာ….။ ဒါပေမယ့် ရဲရဲမကြည့်ရဲ။ အသည်းကတော့ တဖိုဖို…။ သည်လိုနှင့်….၊ သည်လိုနှင့်…..။
ကဆုန်လပြည့်ပေါင်းများစွာ….သူ့ဘာသာဖြတ်သန်း….၊ ဖြတ်သန်းသွားတာကြာပေါ့…..။
ဧပြီကုန်တော့မေ…။
ချစ်စွာသောမေ…..။
မေကတော့ တက်ကြွမှု၏ပြယုဂ်တစ်ခု။ တစ်ကမ္ဘာလုံးက သတိရနေဦးမည့်မေ….။ စစ်အေးကာလအတွင်းကတော့ 'မေ'သည် အရှေ့ဥရောပအာရှ၊ လက်တင်အမေရိကမြေများပေါ်တွင် ရဲရဲလှုပ်ခတ်နေ၏။ အခုလို ဗဟုဝါဒလွှမ်းခြုံကာလမှာ 'မေ'၏သရုပ်က …. ငွေကြေး၊ ဈေးကွက်ပြိုင်ဆိုင်မှု အတတ်ပညာ၊ အရောင်းအဝယ်၊ ကွန်ပျူတာ ဖန်တီးမှု စွမ်းအားများအကြား ငုပ်လျှိုး ပျောက်ကွယ်သွား…..။ တကယ်တော့ 'မေ'သည် လူတစ်စုမဟုတ်၊ ဆိုင်းဘုတ် တစ်တခုမဟုတ်။ အလံတစ်လက်မဟုတ်။ စင်မြင့်တစ်ခုမဟုတ်။ သန်းပေါင်းများစွာသော အလုပ်လုပ်သည့် လူသားများ၏ 'မေ'။ သူတို့၏အနှစ်သာရ…။ အကာအကွယ်၊ ရပိုင်ခွင့်၊ တန်ဖိုး…။
သည်လိုနှင့်….၊ သည်လိုနှင့်…။
'မေ'ပေါင်းများစွာ၊ သူ့ဘာသာသူဖြတ်သန်း….၊ ဖြတ်သန်းသွားတာကြာပေါ့။
စတိုးဆိုင်ကြီးများမှာတော့ အရောင်းစာရေးမအလိုရှိသည် ဆိုင်းဘုတ်ကိုအမြဲတမ်းရေးကာ ချိတ်ဆွဲထားကြ၏။ စာရေးမလေးတွေ ရက်(၂ဝ)နှင့် အသစ်ပြောင်းနေကြသည်…..။
မနက်(၈)နာရီဆိုင်အဖွင့်အမီရောက်ရပြီး ည(၉)နာရီခွဲမှပြန်ကြရလို့ တစ်နေ့အလုပ်ချိန်(၁၂)နာရီကျော်နေကြ၏။
တရုတ်နှစ်သစ်ကူးဆိုင်ပိတ်မှပဲ ဝင်းလိုက်ရုံမှာ ရုပ်ရှင်ကြည့်ဦးမယ်ဟု ကြိမ်းဝါးနေသည့် လက်ဖက်ရည်ဆိုင်က စားပွဲထိုးလေးတွေ ဘယ်ရောက်သွားပါလိမ့်။ သူတို့နေရာမှာ သူတို့ထက်အများကြီးငယ်တဲ့ ကလေးလေးတွေတောကရောက်လာကြ၏။
အရှုံးပေါ်သောကြောင့် စက်ရုံကြီးပိတ်လိုက်သည်။ အလုပ်သမားများ(၃)လစာနှင့် ကျေနပ်လိုက်ကြရ၏။ (၃)လစာရသည်ကိုပင် ကျေးဇူးတတင်တင်….။
အလွဲသုံးစားမှုကြောင့် ကုမ္ပဏီဒါရိုက်တာကြီးအရေးယူခံလိုက်ရသည်။ စိတ်ကျလူကျနှင့် ဆေးရုံတက်ရ၏။ မထင်မှတ်ဘံ H.I.V (positive) ဖြစ်နေသည်။ သူနာမည်ကြီးတာ တခြားကိစ္စ…..။ ကုမ္ပဏီက သူနှင့်ပတ်သက်ခဲ့ရသည့်ဝန်ထမ်းမမ၊ မီးမီးလေးတွေ ထိုင်ရမလို ထရမလိုဖြစ်ကုန်သည်။
သည်လိုနှင့်….၊ သည်လိုနှင့်….။
ဧပြီအကုန်'မေ'သို့ ရောက်ရချေပြီ။
မေကိုလည်း… မေ့မေ့လျော့လျော့ဖြတ်သန်းကြရဦးမှာပေါ့။